الأربعاء، سبتمبر 20، 2006

طاطي راسك-أحمد فؤاد نجم

طاطي راسك طاطي طاطي .. انت ف وطن ديمقراطي .. انت بتنعم بالحرية .. بس بشرط تكون مطاطي
لما تكون شغال بذمة .. خايف على مصلحة الأمة .. شغلك يطلع من غير لازمة .. علشان مبيعلاش غير واطي طاطي راسك طاطي طاطي .. انت ف وطن ديمقراطي

لما حاميها يكون حراميها .. وبلاده ورا ضهره راميها .. طالع نازل واكل فيها .. مسنود بالبدلة الظباطي طاطي راسك طاطي طاطي .. انت ف وطن ديمقراطي

لما شقاك يصبح مش ليك .. فقرك سد السكة عليك تتلفّت تلقى حواليك .. إما حرامي و إما عقاطي طاطي راسك طاطي طاطي .. انت ف وطن ديمقراطي

لماتلاقي بلاد الدنيا .. فيها البني آدم حاجة تانية .. وانت في الطبقات الدنيا .. قرد مسلسل أو وطواطي طاطي راسك طاطي طاطي .. انت ف وطن ديمقراطي

لما الجهلة يبقوا أمامك .. أو فوقك ماسكين ف زمامك .. ويسوقك ع الهلكة إمامك .. تشرب م السم السقراطي طاطي راسك طاطي طاطي .. انت ف وطن ديمقراطي

لما الكلمة تكون بتدينك .. لما تخبي ف قلبك دينك .. لما الذل أشوفه ف عينك .. هات إحباطك على إحباطي طاطي راسك طاطي طاطي انت ف وطن ديمقراطي .. انت ف وطن ديمقراطي

9 Comments:

Blogger عمر said...

كل سنه وانتم طيبين وربنا يعود علينا وعليكم الايام بخير

3:28 م  
Blogger عمر said...

والله نجم دة عم الكل ربنا يخليه للغلابه

12:20 ص  
Anonymous غير معرف said...

الله يعينك يا عمي احمد وما كذب عمي نجيب في قصيدته كسميات الله يرحمه

8:34 م  
Blogger mahmoud said...

ده كلام مابعده كلام يا حاج احمد يا نجم

11:50 م  
Blogger عايش ولكن said...

احمد فؤاد نجم مش محتاج تعليق

11:29 ص  
Blogger zazooo said...

في مثل بيقول اللي يعمل ظهره قنطرة يستحمل الدوس
احنا اللي نستاهل

2:01 ص  
Anonymous غير معرف said...

احمد(الله)(ان فى) فؤاد(ى)نجم(يهدينى الى الحق)

4:07 ص  
Anonymous غير معرف said...

احمدنجم هيفضل نجم

9:35 م  
Anonymous اخبار اليوم said...

تسلم ايديك على الموضوع
اخبار اليوم-اخبار مصر

11:59 م  

إرسال تعليق

Links to this post:

إنشاء رابط

<< Home