الثلاثاء، سبتمبر 26، 2006

رجاء لشباب من أجل التغيير

قبل كل شئ أنا فعلا مندهشة من اللي بيحصل في شباب من أجل التغيير (اللي أنا المفروض منهم) من خناقات و قلة أدب. و فعلا مش هتكلم في تفاصيل إلا إني لاحظت أن كل أما حد ييجي يشتم حد يقوله "بلاش شغل النسوان ده" و ده حصل من أكتر من طرف و باعتباري من
"النسوان"
و أنتم مش عايزيين "شغل نسوان" يبقى أمشي بقى و تمشي كل النسوان الأخريات و تبقى مجموعة "جدعان من أجل التغيير" أو من أجل الشتيمة و الردح . مبدئيا أنا محبطة جدا من الحالة اللي وصلنلها و مقتنعة أنها من الفراغ !فكفاية بقة قوي كدة و تعالوا نطلع الغل ده في الشغل مش فبعضنا.
و أقترح صنع مجموعة بريدية أخرى للأعلانات المظاهرات و الأجتماعات و الأخبارو البيانات و تترك المجموعة دي للنقاشات, عشان اللي مش عايز يسمع نقاشات يشيل نفسه\نفسها من المجموعة و بجد يا جماعة الموضوع ده هينظم الدنيا شوية.

13 Comments:

Blogger Alexandra said...

انا مش فاهمة ما داموا كلهم "جدعان" الي بيعملوا الهبل ده، يبقى شغل نسوان ازاي؟؟ في حالة تخبط في كل حاجة مش في شباب من أجل التغيير بس، كلنا المفروض نتلم ونركز ونشتغل . على فكرة انا متابعاكي من زمان وأتقابلنا مرة قبل كده بشكل عابر

2:15 م  
Blogger 7arAnkash said...

مجموعة بريدية تانية
يانتاشة :)
اقصد مجموعة بريدية تالته
هو انتي مش عارفه ان شباب من اجل التغيير فعلا ليها مجموعتين بريديتين
بس مش بالتصنيف اللي قولتي عليه
لا دي بتصنيف تاني خالص
قال ايه واحده شرعية
والتانية غير شرعية
لشباب من اجل " التغيير والله اعلم" لكن انا متفق معاكي تماما ان ده نتيجة لحالة من الفراغ
وحالة الفراغ دي كان ممكن تبقي كويسة لو قعدنا نفكر مثلا هنعمل ايه بعد كده او هنتحرك ازاي
لكن ارجع واقول اومال جمال هيمسك إزاي :)
انا رايي اننا نعمل مباردة
ايه هيه انا بصراحه مش عارف
انما الحل اننا ندعو لشغل
شغل حقيقي
ان شاء الله حتي دعوة لمظاهرة قدام نقابة الصحفيين
يكون الغاية منها ان الناس ترجع تشتغل تاني
وتسيبها من الكلام الفارغ ده اللي مش جايب همه
وربنا يسهل
خلينا بقي انا وانت وهوه واي حد حب شباب من اجل التغيير وخايف عليها وعايزها تحقق النجاح
اننا ندعو لشغل يتلم حوالية الشباب
ويمكن يسبوهم شوية من الخناقات

كل ده رغي ياحرنكش:)

3:26 م  
Anonymous عبدالله النديم said...

بصراحة ياسلمى انا شايف ان العملية ليها جذور أكبر من شباب وجدعان ليها جذور فى تركيبة الحركة نفسها د رأيى ورأيى ان ده مالوش علاقة بالكلمة المحفوظة بتاعت شغل, انهى شغل وهو الشغل مايبقاش غير وقفة ردح برضه بس للدولة على سلم نقابة الصحفيين, الشغل ياحرنكش افندى اللى من غير عقل هو اللى وصل للذكورية العظيمة اللى بتشكى منها سلمى الحركةوغيرها محتااجة تجاوب على اسئلة كتير قبل موضوع اهتف اهتف م البلكونة على حد تعبير سمسمة

4:58 م  
Blogger salma said...

في فعلا مبادرة جاية في الطريق قريب قوي, هستنى بس لمى أصحاب الفكرة يقعدوا سوى و ينظموها و بعدين هتطرح على الجميع

6:24 م  
Anonymous taghreed said...

فضونا بقي من الخلافات والخناقات والكلام في اللي فات لو في شباب كتير كده عندهم استعداد كده وملوا من الوضع الحالي في شباب وكفايه طب يلا ننزل المواقع ونشتغل احنا مش نستنا حد يقولنا في مظاهره بكره اجتماع والا ............ يلا بينا للمواقع والا حياء الشعبيه يلا بينا ياشباب واولها شبرا (الي شبرا ياشباب) الناس بدأت تعمل فيها حاجه بالفعل يلا بينا نروح نشوفهم بيعملوا ايه ولو كده نناضل معاهم علي ارض المعركه وليس من علس الكراسي ومن مقرتنا يلا بينا ننزل للناس
تعالوا نناضل بجدفي شبراالخيمه يوم الخميس بكره28/9/2006 الساعه 8.00م في مركز الدراسات الاشتراكيه والعنوان كالآتي
1 شارع الشعراوي – الدور الثاني - متفرع من الشارع الجديد – مسطرد – فوق سيتي نت

لعلها تكون البداية لتكوين جناح لحركة التغيير في شبرا الخيمة..

دعونا نبدأ.. دعونا نكون ملهمين لغيرنا


طريق الوصول:
· ميدان عبد المنعم رياض: سيارات المؤسسة – ومن ميدان المؤسسة (خلف محطة القطار) سيارات مسطرد والنزول على ناصية شارع محمد متولي الشعراوي (متفرع من الشارع الجديد).
· مترو الأنفاق: الركوب من محطة السادات (التحرير) طريق الجيزة شبرا والنزول في محطة شبرا الخيمة ثم ركوب سيارات مسطرد مثل الطريق السابق.
· طريق غمرة: الركوب من فوق كوبري غمرة سيارات تتجه لما بعد كوبري مسطرد والنزول على ناصية الشارع أما لو كانت السيارات تصل فقط لتحت كوبري مسطرد فيكون النزول هناك ثم أخذ سيارات المؤسسة

12:45 م  
Anonymous حسام said...

أرجو أن يتجاوز الجميع خلافاتهم، وعدم التراشق بين الزملاء بالاتهامات والألفاظ الخارجة والذكورية.. الناس المفروض تركز هما دخلوا السياسة ليه وتكثف مجهوداتها لتغيير النظام مش تبادل الشتائم.
شدي حيلك يا سلومة، وأنا مبسوط انك رجعت تدوني مرة أخرى بانتظام، وسلام كبير لكل شباب الحركة..

7:46 م  
Blogger الحكائين said...

أرى أنه ليس هناك من جديد في مسار الحركة المصرية من أجل الحياة... فتوازن هذا المجتمع سيبقى دائما "طاطي راسك تعيش" و "عيش ندل تموت مستور" و "مفيش فايدة" و "الشغل" هو حالة من العلاج النفسي لشباب فقدوا الكثير من توازنهم النفسي أو مثلي مرضى مكتئبين (مثل ثلثى هذا الشعب) و حكاية "شغل نسوان" مع اعتراضي الشديد على الغرض اللفظي منها إلا أنها موروث مصري خالص مثلها مثل "قشطة" و "مية بيضا" و "زى القمر" من كلمات مفرغة المعنى اللفظي و لكنها لها معنى عند أصحابها
في الأدب يقولون: مبالغة محمودة لصدق عاطفة الشاعر

11:41 ص  
Anonymous واحدة said...

اقتراحي محدد.. اللي تسمعيه بيقول شغل نسوان تاني, او اي حاجة من النوع ده, امسحي بكرامته الأرض. بتكلم جد. جربتها معاهم قبل كدا ونفعت. عموما الفاضي يعمل قاضي. انسي شباب من اجل التغيير لإنها جابت آخرها خلاص. على كل المستويات اقصد. ركزي في المبادرة اللي بتتكلمي عليها وقلولينا عشان نشارك. تحياتي لك سلمى.

1:05 م  
Blogger salma said...

الحكائين,
أعلم أن "شغل نسوان" موروث شعبي و لكنه موروث متخلف و ذكوري و الخ. و بم أن شباب من أجل التغيير المفروض أنهم مهتمون ب"التغيير" للأفضل إذن فيجب التخلي عن هذه الأجزاء من موروثنا الشعبي.و أنا لاحظت أن من استخدم هذا التعبير كان يقصد أن الأخر جبان و مكار و "مش راجل" و أنا أرفض هذا تماماً

1:34 م  
Blogger CAESAr-DIABLo said...

جميل الكلام ده .. الناس فعلا في شباب حاجة تقرف .. و انا كنت اتكلمت في ده من فترة طويلة قوي ..انا مش قصدي حاجة و لا أنا أحسن واحد بس انا بجد محبط .. مفيش كائن واحد قدر يخليني أصدقه أو أحس انه بيشتغل بجد .. ومفيش حد هيقدر يعمل حاجة لوحدة .. أنا مش هقول هي دي مصر و هم دول المصريين .. بس دي للاسف حقيقة الناس اللي جوه الحركة بيتريقوا و يشتموا في الناس اللي بره الحركة و اللي همه زيهم بالظبط .. اما بقي عن موضوع شغل نسوان ده فهي نفس الفكرة .. الناس اللي المفروض مثقفين و ضد العنصرية هم برده عنصريين و المجتمع المصري كله بجنسينه مجتمع ذكوري ..إلا قلة طبعا ..بس و الله قلة أقل من القليلة .. الموضوع محتاج اعادة فلترة ..

10:40 م  
Blogger Dmo3 Al Kohl said...

كل سنة وانتى بألف خير يا سلمى
معلش طلب صغير قد كــــــــدة
اتمنى تضيفى اسم مدونتى عندك فى صفحتك
طبعا اذا شوفتى انها تستحق دة
المدونة اسمها دموع الكحل
http://dmo3alkohl.blogspot.com/

ويا رب تكونى مرتاحة البال دايما

12:42 ص  
Blogger أحمد said...

سيادتى سادتى : نحن نسبح في البطاطس و الفضاء

4:16 م  
Anonymous اخبار اليوم said...

تسلم ايديك على الموضوع
اخبار اليوم-اخبار مصر

11:59 م  

إرسال تعليق

Links to this post:

إنشاء رابط

<< Home