الاثنين، مارس ٢٦، ٢٠٠٧

آخر أخبار المعتقلين

أخبار أنهم بيسيبوا المعتقلين واحد ورا التاني في الصحرا و حالياً عمر سيزر طلع و هو كويس
مبروك و عقبال التانيين
تحديث: تم العثور على عمر أسد
و أحمد سمير تايه في الصحرا
ولسة الباقيين

تحديث 3:41
أحمد سمير وجد و أدهم الصفتي و هم بخير و مازال البحث عن الباقيين

لا تنسوا أول جلسة في قضية حجب المواقع غداً

على الجميع العلم أن كل المدونات و المدونين في خطر من القضية دي, القضية مش بتاعة مواقع بعينها دي تخصنا كلنا
الجلسة بكرة في مجلس الدولة (شارع مراد في الجيزة) الساعة 9 بالضبط
أرجو ألتزام الجميع بالميعاد لأن القضاه ممكن يتلككوا فأي حتجة و يمنعوا الناس من الدخول
القضية قضيتنا كلنا , و حتي اللي مش مدونين, موقع هشام مبارك (اللي بيدافعوا عنا و يتشحططوا ورانا) كمان متهم,
كل التفاصيل هنا

الأعتصام مستمر في نقابة الصحفيين

مازال هناك 50 ناشط معتصمين في نقابة الصحفيين و سيستمر الأعتصام طوال اليوم

أحداث مظاهرة 25 مارس2007 ضد التعديلات الدستورية و الأستفتاء

وصلت التحرير الساعة 6 بالضبط و كان النشطاء مل 5 مع بعض حاولت أوصل للميدان اللي فوسط التحرير بس الأمن كان محاوط كل حتة و أنا و شيماء حاسبو عرفنا نعدي بس هم كانوا بيضربوا الأولاد و البنات بيزقوهم و شفنا جيميهوود و هو بيتقبض عليه , حاولت أوزع الكام نشخة من البيان اللي كانوا معايا بس أخدوهم مني , و بالزق وصلنا الرصيف اللي في شارع طلعت حرب و كنا بقينا 30 تقريبا في أجانب و صاحفيين قعدوا يزقونا و يقولوا "يالا على نقابة الصحافيين" و في وسط الزق كان بيبقى في ضرب,شلاليت و زق عنيف , وصلنا قبل ميدان طلعت حرب ب50 متر تقريباً و قابلنا مجموعة تانية ابتدا الهتاف فجت مجموعات من البلطجية تزقنا على الرصيف بعنف و كردنونا و كنا مش في كردون واحد و ابتدوا ضرب تاني, و تفعيص و تحرش و بعدين جابوا عربية ترجيلات زرقا كبيرة فعرفنا انهم هيبتدوا القبض بس ظابط لابس مدني جه ة قال بهدوء يا جماعة مش هنقبض على بنات , أخدوا عمر مصطفى (عمر سيزر) و حسام و أحمد سمير و أحمد الدروبي و فضل باسم خليفة و أنا و رشا و شيماء حسبو و سارة من حزب الغد ضربونا و بعدين زقونا لميدان طلعت حرب و رشوا رذاذ الفلفل و بعدين سابونا, مشيت أنا و رشا و شيماء و باسم على ناحية نقابة الصحافيين و بعدين لقينا عربية الترحيلات الماشية ف نطينا في تاكسي و مشينا وراها,و لمدة ساعتين كنا حوالين العربية حتى رجعنا جبنا العربيات و رجعنا تاني طريق اتوستراد المعادي و لفينا بالعربيات ورا عربيات الترحيلات لحد وصولهم لمعسكر تدري الأمن المركزي أمام سجن طرة و بعدين وقفنا عشان نشوف اللي هيحصل بعد دخول عربية الترحيلات بوابة المعسكر و طلع علينا حوالي 15 شخص قالوا انهم من مباحث المرور و عايزين الرخص عشان في بلاغ عن سرقة سيارة و قعدوا يقولوا أي كلام و هم محاوطين العرابية و حاطين حجر تحت العجل و فاتحوا العربية و قعدوا يدوروا على رقم الشاسييه !!!!المهم عطلونا لحد ما العربية مشيت و تاهت مننا
العربية دلوقتي لسة في منطقة التجمع الخامس يقال أنهم عربيتين واحدة فيها دروبي و عمر سيزر و أحمد سمير و كريم الشاعر و آخريين و التانية فيها جيميهوود و آخريين و حالة الناس كويسة و أحمد الدروبي بخير

الخميس، مارس ٢٢، ٢٠٠٧

مش عايزين تعديل دستور .. عايزينك ترحل وتغور

يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .
تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !
أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .
يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .
احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!
دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .
يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .
شباب بيحلم ببكرة

ممكن طبع و توزيع البيان إلي يوم المظاهرة

التسميات: , , ,

الثلاثاء، مارس ٢٠، ٢٠٠٧

مالك مخطوف

أخبار أن مالك أتخطف و هو رايح يشارك في الوقفة اللي كان منظمها نواب مجلس الشعب السلعة 12
التفاصيل على موقع كفاية هنا

الجمعة، مارس ١٦، ٢٠٠٧

يا حضرة الظابط أنا حزب التجمع , مليش دعوة بالمظاهرة

شئ عظيم لما الواحد يحس بكل الدعم ده من قوى المعارضة اللي اتربينا على قصصها
امبارح في ال"مظاهرة" و بعد ما اتقبض على 35 مشارك , قررت الناس الأعتصام الي خروج المعتقلين
كردونات الأمن الرهيبة ماكنتش بتعدي حد , و زهلت لما شفت اعضاء حزب التجمع و الناصري (اللي كان عامل انخباته في مقر التجمع) بتأكد للظباط انهم عايزين يخرجوا و أنهم ببساطة ملهمش دعوة بالمظاهرة
ده حتى في واحد كان هيطلع كارنيه الحزب عشان يأكد للظابط
بالرغم من أني عارفة أن الناس دي فعلاً كانت جاية للأنتخابات و مش للمظاهرة إلا اني حست بالقرف الشديد من الكلام ده ,
موقف عرة من ناس عرر و مش جديد علينا , بس يمكن أنا دايماً مش ببقى عارفة أد ايه الصورة وحشة و قبيحة
و برضه الواحد يعرف هو حجمه أد ايه لما ييجي يخطط لعمل
فأعرفوا يا أخواني و أخواتي الشباب أن حاملي كارنيهات حزب التجمع و الناصري ملهمش دعوة بالمظاهرات
اتفوووه

التسميات: , ,